Նվիրաբերել

Սոցիալական նորարարության ինկուբատոր

Կայծ՝ խթանելով կրթության նորարարությունը

Գործող հաստատությունների փոփոխությունը մի պայքար է, ապագայի ստեղծումը՝ մեկ այլ։ Հենց այստեղ է իր դերը ստանձնում Հայաստանի կրթական նախաձեռնության (ՀԿՆ) Կայծ սոցիալական նորարարության ինկուբատորը։ Այն խթանում է համարձակ նոր լուծումները՝ հենվելով ՀԿՆ-ի տարբեր ծրագրերի մանկավարժների և շրջանավարտների ստեղծարարության վրա։

Ինչո՞ւ Կայծ

Քանի որ կրթության խնդիրները չեն լուծվելու նույն հին մեթոդներով։ Խնդիրներին ամենամոտ կանգնած մարդիկ՝ ուսուցիչները, նախկին ուսուցիչներն ու համայնքային առաջնորդները, հաճախ արմատական փոփոխության գաղափարներ ունեն, սակայն ավանդաբար հնարավորություններ չեն ստանում ձեռնարկներ մեկնարկելու կամ դասարանից դուրս բարեփոխումներ առաջնորդելու համար։ Կայծը փոխում է այս մոտեցումը. եթե կարող եք պատկերացնել այն, և այն կօգնի աշակերտներին սովորել, մենք կօգնենք ձեզ այն ստեղծել։ Սա Հայաստանի առաջին և միակ ինկուբատորն է, որը բացառապես նվիրված է կրթական ձեռնարկներին։

Ո՞ւմ համար է

Կայծը բաց է ՀԿՆ-ի ծրագրերի բոլոր շրջանավարտների համար՝ ներառյալ «Դասավանդի՛ր հանուն Հայաստանի», «Սերունդ»-ի և մեր տարբեր ակադեմիական ու հավաստագրման դասընթացների։ Առանձին դեպքերում դիտարկում ենք նաև այլ մանկավարժների և երիտասարդ նորարարների մասնակցությունը, հատկապես մեր շրջանավարտների հետ համագործակցությամբ։ Նրանց միավորում են գործնական փորձն ու նորարարություն ստեղծելու մղումը։

Ինչպե՞ս է աշխատում Կայծը. երեք փուլ

  • ԳԱՂԱՓԱՐԻ ՆԵՐԿԱՅԱՑՈՒՄ՝ Գաղափարի համար։ Ինքնուրույն ուսուցման մոդուլներն ու աշխատարաններն օգնում են մասնակիցներին հստակեցնել գաղափարը, ստուգել դրա անհրաժեշտությունը և սովորել սոցիալական ձեռներեցության հիմունքները։ Նրանք փորձարկում են գաղափարի ներկայացումը և մշակում պարզ փորձնական առաջարկ։ Լավագույն գաղափարները ստանում են փոքր դրամաշնորհներ կամ ոչ դրամական աջակցություն։
  • ՆԱԽԱՏԻՊԻ ՍՏԵՂԾՈՒՄ՝ Ավելի հստակ ծրագիր կամ փոքր փորձնական նախագիծ ունեցողների համար։ Ինտենսիվ մենթորություն, կապեր փորձագետների հետ և վերապատրաստում՝ ազդեցության չափման, ֆինանսական պլանավորման ու օգտատիրոջ կարիքների վրա հիմնված նախագծման թեմաներով։ Մասնակիցները ստեղծում են գործող նախատիպ՝ օրինակ հավելված, ուսումնական ծրագիր կամ համայնքային կենտրոնի մոդել, և աջակցություն ստանում ոչ առևտրային կազմակերպություն կամ բիզնես գրանցելու և ֆինանսավորում գտնելու հարցերում։
  • ՄԵԿՆԱՐԿ ԵՎ ԱՐԱԳԱՑՈՒՄ՝ Ամենահեռանկարային ձեռնարկներն անցնում են վերջին փուլ։ Կայծի Գաղափարի ներկայացման և Նախատիպի ստեղծման փուլերն ավարտած ձեռնարկները Մեկնարկի ուղղությամբ կենտրոնանում են աճի համար անհրաժեշտ կազմակերպական կարողությունների վրա։ Արագացման ուղղությունը շեշտադրում է ղեկավարների խորհրդատվությունը, կապերի ստեղծումն ու տաղանդների ներգրավումն այն ձեռնարկների համար, որոնք արդեն արձանագրել են հաջող արդյունքներ։

Նորարարությունների տեսակները՝

  • Շրջանավարտ, որը նախատիպավորում է կրթական տեխնոլոգիաների հարթակ՝ ԱԲ-ի միջոցով անհատականացնելու տարրական դասարանների աշակերտների գրագիտության հայերեն վարժությունները։
  • Թիմ, որը գործարկել է շրջիկ գիտական լաբորատորիա՝ լաբորատորիա չունեցող հեռավոր գյուղերի դպրոցներ հասցնելով գործնական ԲՏՃՄ ուսուցում։
  • Խումբ, որը ստեղծել է հոգեկան առողջության ուսումնական ծրագիր և ուսուցիչների վերապատրաստում՝ հոգեբանական տրավմա վերապրող աշակերտներին աջակցելու համար։
  • Քաղաքականությանն ուղղված նորարարություններ, օրինակ՝ ավագ դպրոցներում մասնագիտական ուսուցումը ներառելու նոր մոդել։
  • Համայնքահեն ձեռնարկներ, այդ թվում՝ շրջանավարտների զույգի կազմակերպած առաջնորդության ամառային ճամբար՝ սահմանամերձ մարզերի աղջիկների համար։

Եթե այն լուծում է կրթական անհավասարության կամ հանրակրթության որակի խնդիր, ապա տեղ ունի այստեղ։

Աջակցություն և մենթորություն

Կայծի մասնակիցներին հասանելի է փորձառու մասնագետների մեր ողջ ցանցը, Teach For All ցանցի փորձագետների և ոլորտի առաջնորդների մենթորություն, կապեր պետական պաշտոնյաների հետ՝ փորձարկումների համար, նորարար գործընկերների համայնք և հմտությունների զարգացման աշխատարաններ՝ բիզնես պլանավորումից մինչև հանրային խոսք ու քրաուդֆանդինգ։

Մինչ այժմ ունեցած ազդեցությունը՝

  • Աջակցություն են ստացել տասնյակ նախագծեր, որոնցից մի քանիսը դարձել են անկախ կազմակերպություններ կամ շարունակում են փորձնական գործունեությունը։
  • Մշակութային փոփոխություն. ուսուցիչներն ու շրջանավարտներն այժմ ձեռներեցությունը դիտարկում են որպես իրական ուղի։ «Ինչ-որ մեկը պետք է լուծի սա» մոտեցումից՝ դեպի «Ես կլուծեմ սա»։
  • Կայծից հետո մի շարք ձեռնարկներ ներգրավել են լրացուցիչ արտաքին ֆինանսավորում՝ ընդհանուր առմամբ տասնյակ հազարավոր դոլարների չափով։
  • Կայծը ՀԿՆ-ին հաստատել է որպես նորարարության գաղափարական առաջնորդ՝ ոչ միայն ծրագրեր իրականացնող, այլև հարթակ, ուր մարդիկ բերում են իրենց գաղափարները։

Մեր ձեռնարկների ներկայացում

  • ԴուԷլ՝ Փորձարկվելով Հայաստանի բոլոր 10 մարզերի ավելի քան 400 աշակերտների հետ՝ ԴուԷլը տրամադրում է աշխատանքի վրա հիմնված ուսումնառության փորձառություններ, որոնք օգնում են երիտասարդներին, հատկապես գյուղական համայնքներում, ուսումնասիրել մասնագիտական ուղիները և ավելի տեղեկացված որոշումներ կայացնել իրենց ապագայի վերաբերյալ։
  • Նոր Դաս՝ Արձագանքելով Հայաստանում ուսուցիչների վերաատեստավորման նոր պահանջներին՝ Նոր Դասը մշակել է խաղայնացված առցանց ուսուցման մոդուլներ՝ մանկավարժներին օգնելու պատրաստվել ատեստավորման քննություններին։ Հարթակից օգտվող ուսուցիչներն արձանագրել են ատեստավորման 15–25%-ով ավելի բարձր միավորներ։
  • Հավասար՝ Բաժանորդագրության մոդելով գործող Հավասարը խթանում է ներառական կրթությունը՝ դասագրքերը տեսողության և լսողության խանգարումներ ունեցող աշակերտներին հասանելի դարձնելով ձայնային ընթերցմամբ ու ժեստերի լեզվով ուղեկցվող տեսանյութերով։

Տեսլական

Մենք մտադիր ենք Կայծը զարգացնել որպես հզոր ինկուբատոր և աքսելերատոր, որը կստեղծի Հայաստանից դուրս ընդլայնվող լուծումներ։ Հայաստանը կարող է դառնալ տարածաշրջանի կրթական նորարարության կենտրոն. մեր յուրահատուկ մարտահրավերները պահանջում են ստեղծարար լուծումներ, որոնք կարող են օգնել նաև այլ երկրների։

Գաղափա՞ր ունեք։ Եկե՛ք այն կյանքի կոչենք։ Դիմե՛ք Կայծին՝ միանալու մեր հաջորդ խմբին։ Բիզնեսի առաջնորդներ և ՏՏ մասնագետներ՝ միացե՛ք որպես կամավոր մենթոր։ Ներդրողներ և հիմնադրամներ՝ ֆինանսավորե՛ք Կայծի նախագիծ և աջակցե՛ք հաջորդ բեկմանը։ Միասին հազարավոր կայծեր վառենք։