Նվիրաբերել

Ազգային առաջնորդության ծրագիր

Դասավանդի՛ր հանուն Հայաստանի

«Դասավանդի՛ր հանուն Հայաստանի» Ուսուցիչ-առաջնորդը դասարանում աշխատում է աշակերտների հետ։

Ուսուցիչ-առաջնորդների բանակի ձևավորում

Մենք սկսում ենք այնտեղից, որտեղ միշտ սկսվում է փոխակերպումը՝ դասարանից։ Հայաստանի կրթական նախաձեռնության (ՀԿՆ) առաջատար Ազգային առաջնորդության ծրագիրը երկամյա կրթամասնագիտական ծրագիր է, որը հավաքագրում է Հայաստանի առավել նվիրված, կարողունակ և հայրենասեր մարդկանց՝ թե՛ տեղացիների, թե՛ սփյուռքահայերի՝ մեծ կարիքներ ունեցող համայնքներում դասավանդելու համար։ Բայց սա սովորական դասավանդման ծրագիր չէ. այլ առաջնորդության և ազգաշինության՝ կյանք փոխող փորձառություն է։

Ի՞նչ ենք փնտրում

Բարձր մոտիվացիայով շրջանավարտներ և երիտասարդ մասնագետներ, որոնք հրաժարվում են համակերպվել առկա վիճակի հետ։ Մենք փնտրում ենք առաջնորդելու վճռականություն և ծառայելու սիրտ ունեցող մարդկանց։ Մեր Ուսուցիչ-առաջնորդներն ունեն տարբեր փորձառություններ. նրանք՝ ինժեներներ, արվեստագետներ, գիտնականներ, նորավարտ շրջանավարտներ, մասնագիտությունը փոխող մարդիկ են։ Ի՞նչն է նրանց միավորում։ Ընդհանուր համոզմունքը, որ կրթությունը կարող է փոխել աշխարհը, և որ իրենք անձամբ կարող են առաջ տանել այդ փոփոխությունը։

Վերապատրաստում և աջակցություն

  • 01

    Նախնական վերապատրաստում

    Հինգշաբաթյա առցանց ծրագիր՝ դասապրոցեսի պլանավորման և դասարանի կառավարման հիմնարար հմտություններ ձևավորելու, ինչպես նաև կրթական արդարության մեր տեսլականը յուրացնելու համար։

  • 02

    Ուսուցչական առաջնորդության ակադեմիա

    Յոթշաբաթյա ինտենսիվ ամառային վերապատրաստում, որը համադրում է համաշխարհային լավագույն փորձը տեղական համատեքստի հետ։ Մասնակիցները սովորում են մեր Առաջնորդության շրջանակը, որը միավորում է գերազանց դասավանդման պրակտիկան և հարմարվողական առաջնորդության հմտությունները, ու դասավանդման փորձառություն ստանում ամառային դպրոցի դասարաններում։ Վերապատրաստման ավարտին Ուսուցիչ-առաջնորդները ստանում են 30-կրեդիտ դասավանդման հավաստագիր, որը նրանց հնարավորություն է տալիս դասավանդել դպրոցներում։

  • 03

    Տեղակայում

    Երկու տարվա դասավանդում մեծ կարիքներ ունեցող հանրակրթական դպրոցում, հաճախ՝ ռեսուրսների պակաս ունեցող գյուղերում կամ քաղաքներում։ Ուսուցիչ-առաջնորդներն ամբողջական դրույքով դասավանդում են՝ քննադատական մտածողություն, վստահություն և հույս արթնացնելով երեխաների մեջ, որոնց հաճախ ասել են՝ մեծ երազանքներ մի՛ ունեցեք։

  • 04

    Շարունակական քոուչինգ

    Յուրաքանչյուր Ուսուցիչ-առաջնորդի կցվում է Առաջնորդության զարգացման ղեկավար, որը դիտարկում է, մենթորություն տրամադրում և անմիջական հետադարձ կապ տալիս՝ ծրագրի Առաջնորդության շրջանակի հիման վրա։

  • 05

    Մասնագիտական զարգացման հավաքներ

    Մեր մասնակիցների զարգացող կարիքների շուրջ կառուցված եռամսյակային մարզային և համազգային հավաքներ՝ նախագծահեն ուսումնառության աշխատարաններից ու համայնքի ներգրավման ֆորումներից մինչև մասնագիտական այրման կանխարգելման արտագնա հանդիպումներ։

  • 06

    Փոփոխությունների վրա հիմնված ուսումնառություն և նորարարական նախագծեր

    Աշակերտները բացահայտում են իրենց համայնքի խնդիրը, մշակում այն լուծելու նախագիծ և ներկայացնում փոքր դրամաշնորհ ստանալու առաջարկ։ Մենք տեսել ենք, թե ինչպես են 4-րդ դասարանցիները վերամշակման նախաձեռնություններ սկսում, իսկ դեռահասները՝ ծրագրավորման խմբակներ։ Երկրորդ տարում հաջողված աշակերտական նախագծերին մենթորություն տրամադրած ուսուցիչները կարող են ավելի մեծ դրամաշնորհներ ստանալ՝ այդ գաղափարները ողջ համայնքում ընդլայնելու համար։ Նորարարության այս ուղին անմիջապես կապվում է «Կայծ»-ի հետ, երբ մասնակիցները դառնում են ՀԿՆ-ի որևէ ծրագրի շրջանավարտ։

  • 07

    Ակադեմիական կրթություն և որակավորումներ

    Ուսուցչական կրթություն չունեցող ընտրված Ուսուցիչ-առաջնորդները ծրագրի ընթացքում նաև հնարավորություն ունեն Երևանի պետական համալսարանի հետ գործընկերությամբ ստանալու Ուսուցչական առաջնորդության ամբողջությամբ ֆինանսավորվող մագիստրոսի աստիճան՝ ավարտելով որպես որակավորված, մագիստրոսական մակարդակի մանկավարժներ։ Բոլոր Ուսուցիչ-առաջնորդները ծրագրի ողջ ընթացքում անցնում են շարունակական դասընթացներ և հավաստագրման մոդուլներ։ Մենք պարզապես մարդկանց չենք տեղավորում դասարաններում. ձևավորում ենք համաշխարհային չափանիշներով պատրաստված հմուտ մասնագետներ։

Ծրագրի փորձառությունը

Սակավ ռեսուրսներ ունեցող համայնքներում դասավանդումը բարդ է` բազմադասարանակազմ, պարագաների սակավությամբ, դժվարություններ վերապրած աշակերտներով։ Մեր Ուսուցիչ-առաջնորդները դրանք դիտարկում են որպես հնարավորություններ։ Երկու տարում նրանք դառնում են դիմակայան առաջնորդներ, որոնք երեխաներին մոտիվացնում են՝ ի հակառակ դժվարություններին, ծնողներին ու համայնքներին համախմբում կրթության շուրջ և ապահովում սպասելիքները գերազանցող ակադեմիական աճ։ Այդ համայնքներում ապրելն ու աշխատելը նրանց խորը պատկերացում է տալիս աշակերտների առջև ծառացած համակարգային խոչընդոտների մասին. ըմբռնում, որը նրանց մղում է պայքարելու փոփոխության համար ծրագրին մասնակցությունից հետո էլ։ Սա կրկնակի ներդրում է՝ այսօրվա աշակերտների և վաղվա համար ձևավորվող առաջնորդների մեջ։

Ներազդեցությունը դասարանում

Մեր Ուսուցիչ-առաջնորդներն ամեն տարի աշխատում են ավելի քան 20,000 աշակերտի հետ։ Անկախ գնահատումներն ու մեր սեփական ուսումնասիրությունները ցույց են տալիս հստակ առաջընթաց՝ գրագիտության և մաթեմատիկայի արդյունքների բարելավում, որոշ գյուղերում ավարտողների ավելի բարձր ցուցանիշներ և, նույնքան կարևոր, թեև պակաս չափելի, աշակերտների ինքնավստահության, հավակնությունների ու բարեկեցության աճ։ «Ի՞նչ ես ուզում դառնալ, երբ մեծանաս» հարցին նախկինում ուսերը թոթվող երեխաներն այժմ պատասխանում են՝ «բժիշկ», «ինժեներ», «ուսուցիչ», «ինչու ոչ՝ վարչապե'տ»։

Երկու տարի անց

Մեր Ուսուցիչ-առաջնորդները դառնում են Շրջանավարտ-դեսպաններ և մեր երկարաժամկետ ազդեցության բաբախող սիրտը։ Շատերը շարունակում են դասավանդել կամ ղեկավար դերեր ստանձնել դպրոցներում, մյուսները մասնագիտական ճանապարհ են կառուցում հանրային ծառայության, քաղաքականության ոլորտներում կամ հիմնում կրթական նախաձեռնություններ։ Ոմանք միանում են մեր աշխատակազմին կամ քոուչինգ տրամադրում հաջորդ սերունդներին։ Teach For All-ի միջոցով նրանք կապվում են 60 երկրների ավելի քան 70,000 շրջանավարտների հետ՝ գաղափարներ փոխանակելով Արգենտինայից մինչև Հնդկաստան և միջազգային նորարարությունները բերելով հայրենիք։ Մեր Շրջանավարտ-դեսպաններն արդեն ծառայում են որպես դպրոցների տնօրեններ, շահույթ չհետապնդող կազմակերպությունների ղեկավարներ, կրթական տեխնոլոգիաների հիմնադիրներ և կառավարության խորհրդատուներ։

Գործելու կոչ. դարձի՛ր Ուսուցիչ-առաջնորդ

Պատրա՞ստ ես առաջնորդել փոփոխության առաջնագծից։ Դիմի՛ր «Դասավանդի՛ր հանուն Հայաստանի»-ին և միացի՛ր համարձակ, նպատակասլաց առաջնորդների մի սերնդի, որը վերակառուցում է ազգը՝ դասարան առ դասարան։ Սա պարզապես ուսուցչի աշխատանք չէ. սա խիզախության և ազդեցության ծրագիր է։ Այսօր առաջնորդի՛ր դասարանը, վաղը՝ երկիրը։

Դիմել հիմա